တစ်ယောက်တည်းကျန်

လမင်းဟာ လရိပ်အဖြစ်နဲ့

ပင်လယ်ရဲ့ ရင်ခွင်မှာ

အိပ်စက်ခွင့်ရပေမဲ့

ပင်လယ်ကတော့

လမင်းကို မော်ကြည့်ယုံမှတပါး

အထီကျန်စွာနဲ့ပေါ့  ။

ပန်းကလေးရဲ့ ဘ၀ဟာ

လှပစွာနဲ့ ဖူးပွင့်ချိန်ပဲ

ပိတုန်းနဲ့ လူတွေကသုံးပြီး

ဝတ်ရည်ကုန်လို့ နွမ်းခြောက်သွားရင်တော့

မြေပြင်ပေါ်မှာ

နင်းချေမဲ့ ခြေးလှမ်းတစ်စုံ

စိုးထိတ်စွာ

စောင့်မျှော်ရင်းပေါ့  ။

သစ်ပင်ငယ်ရဲ့ ရင်ခွင်ရိပ်မှာ

တေးချော့သိပ်ပြီး အိပ်စေပေမဲ့လဲ

အဖော်တွေ့လို့

ရုတ်တရက် နှုတ်မဆက်ပဲ

ထပျံသွားတော့

ကျေးငှက်လေးရဲ့

ခြေခတ်ဒဏ်ကြောင့်

ကိုင်းခြောက်လေးလဲ ကျိုးကျရရှာ  ။

လိုရာခရီးနဲ့

ခြေတော်တွေ မနာကျင်ရအောင်

အနင်းခံ ဘ၀နဲ့

 လမ်းကလေးဟာလဲ

နင်းပြီးရင် နောက်ပြန်မကြည့်တတ်တဲ့ သူတွေကြားထဲ

လမ်းရဲ့ ရင်ပြင်မှာ ဒဏ်ရာတွေ

ဗလပွ

နောက်ထပ်အနင်းခံဖို့

ခံနိုင်ရည်တွေ စုစည်း

နာကျင်ခြင်း မျက်ရည်စတွေနဲ့ပေါ့  ။

မခုန်ဖူးတဲ့ ရင်တစ်စုံကို

နှစ်ချို့အချစ်ဝိုင် ချိုချိုလေးတိုက်ပြီး

အချစ်ကလပ်မှာ

ကြင်နာခြင်းတွေနဲ့ ကခုန်ရင်း

ယစ်မူးချိန် ကျဆုံးလို့

အသိတရားတွေ နိုးထ

ေ၀၀ါးဝါးနဲ့

နှလုံးသား တံခါးဖွင့်ကြည့်လိုက်တော့

         အို့

တုံးလုံးပက်လက်နဲ့

ဘ၀စာပွဲမှာ ငါတစ်ယောက်တည်းပါလား   ။

လွင်ပြင်လှိုင်းငယ်